"Җыр булып кайтырмын туган якка"
- Подробности
- Создано 14.04.2016 11:17
- Автор: Imaeva Asiya
13 апрель көнне үзәк китапханәнең милли әдәбият һәм сәнгать бүлегендә ялкынлы шигырьләре белән бөтен татар дөньясын тетрәткән шагыйрь, Татарстанның атказанган сәнгать эшлеклесе якташыбыз Рәшит Әхмәтҗәновның тууына 75 ел тулу уңаеннан аны искә алу кичәсе узды. Кичәгә Рәшит Әхмәтҗәновның иҗатына гашыйк укучылар, тирән ихтирам хисе белән искә алучы дуслары, якыннары килде.
Программада шагыйрьнең шигырьләре, аның сүзләренә язылган җырлар яңгырады.
Кичәдә шагыйрьнең туганнан туган сеңлесе Нәфисә Ильяс кызы Мифтахова, туганнан туган энесе Сәгыйт Әхмәтҗанов үзләренең истәлекләре белән уртаклаштылар. Сәгыйт Әхмәтҗанов шагыйрь абыйсы кебек үзе дә шигырьләр иҗат итә. Ул Рәшит Әхмәтҗановка багышлап язган үзенең шигырен һәм шагыйрь сүзләренә язылган “Болгар иле” җырын башкарды.
Китап укучылар игътибарына шагыйрьнең иҗатына багышланган "Җыр булып кайтырмын туган якка" дип исемләнгән китап күргәзмәсе күзәтү ясалды. Хәтер кичәсе барлык килгән кунакларның күңелендә җылы хисләр калдырды. Алар бүгенге кичәне оештырган барлык китапханә хезмәткәрләренә рәхмәтләрен белдерделәр.
